dari gomeh sampai somban,
nia balik melopeh an rindu
jangan comeh, sajo den meraban,
mintak izin mintak lalu.
dari gomeh sampai somban,
kengkadang balik tak tontu bona jalan
mawak keto dah tontu nak nengok dopan,
naik juling mato menjoling kiri kanan.
dari gomeh sampai somban,
cendol pilah jangan dilupo,
singgah dulu buleh makan,
rojak eh pun umang ai gak raso
dari gomeh sampai somban,
ado daging, itik mo ikan salai,
tolo itik pulak nek moyang an sodap eh makan
buek lomak cili api, dah konyang kang maun tersadai
dari gomeh sampai somban,
jumpo banyak tompek ternamo,
kot raso nak sojuk2 an badan,
singgah dulu ulu bondo
dari gomeh sampai somban,
balik ampangan jonguk orang tuo,
kosan eh osah cantik boto jalan,
flyover eh pun dah bercabang limo.
dari gomeh sampai somban,
kiri kanan sumo eh bangunan,
untung balik kampung tak sosek jalan,
bilo balik jo, mesti ado pembangunan
dari gomeh sampai somban,
melopong den nengok kemajuan
yang elok eh kito koka an
yang tak cantik jangan kito ikutkan.
dari gomeh sampai somban,
lalu simpang bukit rokan
buek sonyum, buek teladan,
kot ado silap mohon maafkan
